നാടെങ്ങും 'പ്രിയദർശിനി'യുടെ കുതിപ്പ്; മജലിൽ സാധാരണക്കാർക്ക് യാത്ര ചെയ്യാൻ ഒരു ബസ് പോലുമില്ല.പത്ത് വർഷത്തെ കടുത്ത വഞ്ചനക്കെതിരെ കളക്ടർക്ക് വീണ്ടും നിവേദനവുമായി പഞ്ചായത്ത് വൈസ് പ്രസിഡന്റ്; അധികാരികൾ കണ്ണടയ്ക്കരുതെന്ന് ജനങ്ങൾ.
മൊഗ്രാൽ പുത്തൂർ : സംസ്ഥാന സർക്കാർ കെ.എസ്.ആർ.ടി.സി വഴി 'പ്രിയദർശിനി' എന്ന പേരിൽ ജനങ്ങൾക്ക് സൗജന്യവും ജനകീയവുമായ യാത്രാപദ്ധതികൾ നാടെങ്ങും വിജയകരമായി നടപ്പിലാക്കുമ്പോഴും, ഒരു ബസ് പോലുമില്ലാതെ മൊഗ്രാൽ പുത്തൂർ ഗ്രാമപഞ്ചായത്തിലെ മജൽ നിവാസികൾ കടുത്ത അവഗണനയിൽ. കഴിഞ്ഞ പത്ത് വർഷമായി മജൽ ജനത അനുഭവിക്കുന്ന ഈ ജീവന്മരണ പ്രശ്നത്തിന് അടിയന്തര പരിഹാരം കാണണമെന്നാവശ്യപ്പെട്ട് ഗ്രാമപഞ്ചായത്ത് വൈസ് പ്രസിഡന്റും അഞ്ചാം വാർഡ് മെമ്പറുമായ അർഫാന നജീബ് കാസർകോട് ജില്ലാ കളക്ടർക്കും ആർ.ടി.എ ചെയർമാനുമായ അർജുൻ പാണ്ഡ്യൻ ഐ.എ.എസ്സിന് വീണ്ടും നിവേദനം നൽകി.
2016 വരെ ഈ റൂട്ടിൽ വിജയകരമായി സർവീസ് നടത്തിയിരുന്ന കെ.എസ്.ആർ.ടി.സി ബസ്, ലാഭകരമല്ലെന്ന നിസ്സാര കാര്യം പറഞ്ഞാണ് പഴയ സർക്കാർ നിർത്തലാക്കിയത്. ജനങ്ങളുടെ അടിസ്ഥാന ആവശ്യങ്ങൾക്ക് മേൽ ലാഭനഷ്ടങ്ങളുടെ കണക്ക് നിരത്തി അന്ന് അധികൃതർ കൈക്കൊണ്ട ജനദ്രോഹപരമായ ആ തീരുമാനം മൂലം ഇന്നുവരെ ഇവിടുത്തെ സാധാരണക്കാരായ ജനങ്ങൾ അനുഭവിക്കുന്ന ദുരിതം വിവരണാതീതമാണ്. പ്രത്യേകിച്ച് പട്ടികജാതി (SC) വിഭാഗത്തിൽപ്പെട്ടവർ, വിദ്യാർത്ഥികൾ, പ്രായമായവർ, സ്ത്രീകൾ, നിത്യരോഗികൾ എന്നിവർ കഴിഞ്ഞ പത്ത് വർഷമായി യാത്രാസൗകര്യമില്ലാതെ വലയുകയാണ്.
പലതവണ കളക്ടർക്ക് മുൻപിൽ നേരിട്ട് മജൽ ജനങ്ങളുടെ യാത്രാപ്രശ്നം അവതരിപ്പിച്ചിട്ടും വകുപ്പുകളുടെ സാങ്കേതിക ന്യായങ്ങളിൽ കുരുങ്ങി ഫയൽ ഇപ്പോഴും ചുവപ്പുനാടയിലാണ്. ആർ.ടി.എ അധികൃതരുടെ ഭാഗത്തുനിന്നും കടുത്ത ഒഴിഞ്ഞുമാറലാണുണ്ടാകുന്നത്. പുതിയ സർക്കാർ വരികയും, ജനകീയ ആവശ്യങ്ങൾക്ക് മുൻഗണന നൽകിക്കൊണ്ട് 'പ്രിയദർശിനി' പോലുള്ള മികച്ച സർവീസുകൾ ആരംഭിക്കുകയും ചെയ്ത പശ്ചാത്തലത്തിലാണ് മജൽ നാട്ടുകാരുടെ പ്രയാസം വീണ്ടും അധികാരികളുടെ ശ്രദ്ധയിൽപ്പെടുത്തുന്നത്.
ഇത്തരം പ്രാദേശികമായ യാത്രാപ്രശ്നങ്ങൾ പരിഹരിക്കാൻ പോലും ജനങ്ങൾക്ക് തിരുവനന്തപുരത്ത് പോയി ബഹുമാനപ്പെട്ട മുഖ്യമന്ത്രി ശ്രീ. വി.ഡി. സതീശനെ കാണേണ്ടി വരുന്നത് ഒട്ടും ആശാസ്യമല്ലെന്ന് അർഫാന നജീബ് ഓർമ്മിപ്പിച്ചു. സംസ്ഥാന സർക്കാർ ജനകീയ പദ്ധതികളുമായി മുന്നോട്ട് പോകുമ്പോൾ, കാസർകോട്ടെ അധികാരികൾ മാത്രം മൊഗ്രാൽ പുത്തൂർ പഞ്ചായത്തിൽ ഉൾപ്പെട്ട സാധാരണക്കാരായ മജൽ നിവാസികൾക്ക് മുൻപിൽ കണ്ണടയ്ക്കരുതെന്ന് അവർ ആവശ്യപ്പെട്ടു.
ആയിരക്കണക്കിന് സാധാരണ ജനങ്ങൾ വസിക്കുന്ന മജൽ ഗ്രാമം കളക്ടർ നേരിട്ട് സന്ദർശിച്ച് ജനങ്ങളുടെ യാത്രാദുരിതം ബോധ്യപ്പെടണം. വകുപ്പുകളുടെ സാങ്കേതിക തടസ്സങ്ങൾ മാറ്റിവെച്ച്, ആർ.ടി.എ ചെയർമാൻ എന്ന നിലയിലുള്ള പ്രത്യേക അധികാരം ഉപയോഗിച്ച് മജൽ റൂട്ടിൽ കെ.എസ്.ആർ.ടി.സി ബസ് സർവീസ് പുനഃസ്ഥാപിക്കാൻ അടിയന്തര നടപടി സ്വീകരിക്കണം. ജനങ്ങളുടെ ഈ ന്യായമായ അവകാശത്തിന് വേണ്ടി നിയമപരമായും ജനാധിപത്യപരമായും ഏതറ്റം വരെയും മുന്നോട്ട് പോകുമെന്നും അർഫാന നജീബ് വ്യക്തമാക്കി.
ഈ വിഷയത്തിൽ അടിയന്തര ഇടപെടൽ ആവശ്യപ്പെട്ട് ബഹുമാനപ്പെട്ട മുഖ്യമന്ത്രി വി.ഡി. സതീശൻ, ഗതാഗത മന്ത്രി സി.പി. ജോൺ, രാജ്മോഹൻ ഉണ്ണിത്താൻ എം.പി, കല്ലട്ര മാഹിൻ എം.എൽ.എ എന്നിവർക്കും നിവേദനത്തിന്റെ പകർപ്പുകൾ കൈമാറിയിട്ടുണ്ട്.
വാർത്തകൾക്കും പരസ്യം നല്കാനും വിളിക്കേണ്ട നമ്പർ: 8907020550 വായനക്കാർക്ക് സ്റ്റേറ്റ് എക്സ്പ്രസ്സ് ന്യൂസ് വാട്സാപ്പ് ഗ്രൂപ്പിൽ ചേരാൻ* താഴെ കാണുന്ന ലിങ്കിൽ ക്ലിക്ക് ചെയ്യുക👇👇👇
https://chat.whatsapp.com/Lb9KI8KEC4wDAtVU2XlcHC
https://chat.whatsapp.com/I5SOV9ZKNeQ1ivwyxEpjz4
https://chat.whatsapp.com/KVyB12YOI1n5zC18W9cZfa
No comments