എൻ.സി.പി പേരും പതാകയും ദുരുപയോഗം ചെയ്ത് ധർണ്ണ ശ്രമം: ഡി.ജി.പിക്ക് പരാതി

തിരുവനന്തപുരം : നാഷണലിസ്റ്റ് കോൺഗ്രസ് പാർട്ടി (എൻ.സി.പി) കേരള ഘടകത്തിന്റെ പേരും പതാകയും ദുരുപയോഗം ചെയ്ത് അനധികൃതമായി ധർണ്ണ സംഘടിപ്പിക്കാൻ ശ്രമിക്കുന്നതായി ആരോപിച്ച് സംസ്ഥാന പ്രസിഡന്റ് കെ. എ. ജബ്ബാറും എൻ വൈ സി സംസ്ഥാന കമ്മിറ്റിയും ഡി.ജി.പിക്ക് പരാതി നൽകി.

ദേശീയ വർക്കിംഗ് പ്രസിഡന്റായ പ്രഫുൽ പട്ടേൽ എം.പി.യുടെ നിയമനപ്രകാരം 2026 മാർച്ച് 16-ന് കെ. എ. ജബ്ബാർ സംസ്ഥാന പ്രസിഡന്റായി ചുമതലയേറ്റതായും പരാതിയിൽ വ്യക്തമാക്കുന്നു. പാർട്ടിയുടെ ഔദ്യോഗിക ഘടനയ്ക്കും ദേശീയ നേതൃത്വത്തിന്റെ നിർദ്ദേശങ്ങൾക്കും വിരുദ്ധമായി ചില വിമതർ പാർട്ടിയുടെ പേര്, പതാക എന്നിവ ഉപയോഗിച്ച് പ്രവർത്തിക്കുന്നതായി അദ്ദേഹം ആരോപിച്ചു.

ഡോ. സജി പോത്തൻ തോമസിന്റെ നേതൃത്വത്തിൽ, പാർട്ടിയിൽ നിന്ന് സസ്പെൻഷനിലായ ചിലർ ഏപ്രിൽ 18-ന് തിരുവനന്തപുരം സെക്രട്ടറിയേറ്റിന് മുന്നിൽ ധർണ്ണ സംഘടിപ്പിക്കാൻ തീരുമാനിച്ചിട്ടുണ്ടെന്നും, ഇത് എൻ.സി.പി പേരിൽ നടത്തുന്ന അനധികൃത പരിപാടിയാണെന്നും പരാതിയിൽ പറയുന്നു.

ദന്തൽ കോളേജ് വിദ്യാർത്ഥി നിതിൻ രാജിന്റെ മരണവുമായി ബന്ധപ്പെട്ട വിഷയത്തിൽ പ്രതിഷേധം സംഘടിപ്പിക്കുന്നതാണെന്നു പറയുന്നുവെങ്കിലും, സംഘാടകർക്ക് പാർട്ടിയുമായി യാതൊരു ബന്ധവുമില്ലാത്തതിനാൽ ഇത് പാർട്ടിയുടെ പേരിൽ നടത്തുന്നത് നിയമവിരുദ്ധമാണെന്ന് ജബ്ബാർ ചൂണ്ടിക്കാട്ടി.

അതിനാൽ, ബന്ധപ്പെട്ട ധർണ്ണയ്ക്ക് അനുമതി നൽകിയിട്ടുണ്ടെങ്കിൽ അത് റദ്ദാക്കണമെന്നും, പാർട്ടിയുടെ പേര്, പതാക എന്നിവ ദുരുപയോഗം ചെയ്യുന്നവർക്കെതിരെ നിയമനടപടികൾ സ്വീകരിക്കണമെന്നും ഡി.ജി.പിയോട് ആവശ്യപ്പെട്ടു.

ഇത്തരം അനധികൃത പ്രവർത്തനങ്ങൾ നിയമ-ക്രമ പ്രശ്നങ്ങൾക്ക് ഇടയാക്കാൻ സാധ്യതയുള്ളതിനാൽ പോലീസ് അടിയന്തരമായി ഇടപെടണമെന്ന് പരാതിയിൽ ആവശ്യപ്പെട്ടിട്ടുണ്ട്.

 വാർത്തകൾക്കും പരസ്യം നല്കാനും വിളിക്കേണ്ട നമ്പർ: 8907020550 വായനക്കാർക്ക് സ്റ്റേറ്റ് എക്സ്പ്രസ്സ്‌ ന്യൂസ് വാട്സാപ്പ്  ഗ്രൂപ്പിൽ ചേരാൻ* താഴെ കാണുന്ന ലിങ്കിൽ ക്ലിക്ക് ചെയ്യുക👇👇👇

https://chat.whatsapp.com/Lb9KI8KEC4wDAtVU2XlcHC

https://chat.whatsapp.com/I5SOV9ZKNeQ1ivwyxEpjz4

https://chat.whatsapp.com/KVyB12YOI1n5zC18W9cZfa