*വാണിജ്യ എൽപിജി വിതരണം: തിരിമറി നടത്തിയാൽ ലൈസൻസ് പോകും; സമരം ചെയ്യാൻ ഹോട്ടലുടമകളും*

തിരുവനന്തപുരം :  വാണിജ്യ എൽപിജിയുടെ വിതരണത്തിൽ ഉണ്ടായിരുന്ന നിയന്ത്രണങ്ങൾക്ക് ഇളവു വരുത്തിയിട്ടും ഗ്യാസ് ഏജൻസികളിൽ നിന്നുള്ള വിതരണത്തിൽ വീഴ്ച ഉണ്ടെന്ന പരാതിയുടെ അടിസ്ഥാനത്തിൽ കർശന നടപടി സ്വീകരിക്കുമെന്ന് സിവിൽ സപ്ലൈസ് കമ്മിഷണർ കെ.ഹിമ അറിയിച്ചു. 

ഏതെങ്കിലും വിഭാഗത്തിന് അനുവദിച്ച എൽപിജി ബിൽ അടിച്ച ശേഷം മറ്റേതെങ്കിലും വിഭാഗത്തിനു വിതരണം ചെയ്യുന്നതായി കണ്ടെത്തിയാലോ ബില്ലിൽ രേഖപ്പെടുത്തിയിരിക്കുന്നതിലും കൂടുതൽ വില ഈടാക്കിയാലോ ഗ്യാസ് ഏജൻസികൾക്കെതിരെ അവശ്യ സാധന നിയമവും എൽപിജി വിതരണ നിയന്ത്രണ ഉത്തരവും അനുസരിച്ച് പ്രോസിക്യൂഷൻ നടപടി സ്വീകരിക്കും. 

കൂടാതെ ഡിസിപ്ലിൻ ഗൈഡൻസിന്റെ അടിസ്ഥാനത്തിൽ ലൈസൻസ് റദ്ദാക്കൽ അടക്കം നടപടി സ്വീകരിക്കുന്നതിന് എണ്ണക്കമ്പനികൾക്ക് ശുപാർശ ചെയ്യുമെന്നും കമ്മിഷണർ വ്യക്തമാക്കി.

സാഹചര്യം മെച്ചപ്പെട്ടതിനാൽ അവശ്യ മേഖലകളിലേക്കു 100% വാണിജ്യ എൽപിജി വിതരണത്തിനും ഹോട്ടൽ, റസ്റ്ററന്റ് ഉൾപ്പെടെയുള്ള മേഖലകളിൽ ആവശ്യകതയുടെ 62% മുതൽ 66% വരെ വാണിജ്യ എൽപിജി വിതരണത്തിനും നിർദേശം നൽകിയിട്ടുണ്ട്.  ഗ്യാസ് ഏജൻസികളിൽ നിന്ന് ഈ അളവ് ലഭിക്കുന്നില്ലെന്നു പരാതി ഉയരുന്നുണ്ട്.

പോർട്ടൽ വഴി ബുക് ചെയ്ത് അലോട്മെന്റ് ആയാലും ചില ഗ്യാസ് ഏജൻസികൾ സിലിണ്ടർ വിതരണം ചെയ്യാൻ മടിക്കുകയാണെന്നു ഹോട്ടലുടമകളുടെ പരാതി. വിതരണം പുനഃസ്ഥാപിക്കാത്ത സാഹചര്യത്തിൽ നിസ്സഹകരണം തുടരുന്ന ഗ്യാസ് ഏജൻസികൾക്കു മുന്നിൽ നാളെ പ്രതിഷേധ സമരം നടത്താനാണ് കേരള ഹോട്ടൽ ആൻഡ് റസ്റ്ററന്റ് അസോസിയേഷന്റെ തീരുമാനം.

സംസ്ഥാനത്ത് വാണിജ്യ എൽപിജി സിലിണ്ടറുകളുടെ വിഹിതം 60% ആക്കി ഉയർത്തിയെങ്കിലും 10% സിലിണ്ടർ പോലും ലഭിക്കുന്നില്ലെന്ന് ഹോട്ടലുടമകൾ പറയുന്നു. സിലിണ്ടർ തരാമെന്നു പറയുന്നതല്ലാതെ വിതരണത്തിനുള്ള നടപടികൾ അധികൃതരുടെ ഭാഗത്തു നിന്നുണ്ടാകുന്നില്ലെന്നും ഹോട്ടൽ ഉടമകൾക്കു പരാതിയുണ്ട്.

ഗാർഹിക സിലിണ്ടർ വിതരണത്തിൽ തടസ്സമില്ലെന്നു കേന്ദ്രം ആവർത്തിക്കുമ്പോഴും വിതരണത്തിൽ അപാകതകളുള്ളതായി വ്യാപക പരാതിയുണ്ട്. 

25 ദിവസത്തെ ഇടവേളയ്ക്കു ശേഷമാണ് ഗാർഹിക സിലിണ്ടർ ബുക്ക് ചെയ്യാൻ കഴിയുക. മാത്രമല്ല, മസ്റ്ററിങ് നടത്തിയവർക്കു മാത്രമേ ബുക് ചെയ്യാൻ കഴിയുന്നുള്ളൂ. 

ബുക്കിങ് പൂർത്തിയായി 10 ദിവസം കഴിഞ്ഞാലും സിലിണ്ടർ വീട്ടിൽ എത്താത്ത അവസ്ഥയാണ് പലയിടത്തും.

 എന്നാൽ ആളുകൾ പരിഭ്രാന്തരായി കൂട്ടത്തോടെ സിലിണ്ടർ ബുക് ചെയ്തതു കൊണ്ടുണ്ടായ പ്രശ്നമാണ് ഇതെന്നും സാധാരണ നിലയിലാകാൻ സമയമെടുക്കുമെന്നുമാണ് ഗ്യാസ് വിതരണക്കാർ പറയുന്നത്.

━━━━━━━━━━━━━━━━━━

 വാർത്തകൾക്കും പരസ്യം നല്കാനും വിളിക്കേണ്ട നമ്പർ: 8907020550 വായനക്കാർക്ക് സ്റ്റേറ്റ് എക്സ്പ്രസ്സ്‌ ന്യൂസ് വാട്സാപ്പ്  ഗ്രൂപ്പിൽ ചേരാൻ* താഴെ കാണുന്ന ലിങ്കിൽ ക്ലിക്ക് ചെയ്യുക👇👇👇

https://chat.whatsapp.com/Lb9KI8KEC4wDAtVU2XlcHC

https://chat.whatsapp.com/I5SOV9ZKNeQ1ivwyxEpjz4

https://chat.whatsapp.com/KVyB12YOI1n5zC18W9cZfa