*വിദ്യാർത്ഥിനികൾക്ക് കരുത്തായി കേരള പോലീസ്: കാസറഗോഡ് ജില്ലയിൽ ‘സ്വയം പ്രതിരോധ സേന’ ഒരുങ്ങുന്നു.*

കാസറഗോഡ് : ജില്ലയിലെ ഹൈസ്കൂൾ, ഹയർ സെക്കന്ററി വിദ്യാർത്ഥിനികൾക്ക് ആത്മവിശ്വാസവും സുരക്ഷയും പകർന്നുനൽകാൻ ലക്ഷ്യമിട്ട് കേരള പോലീസിന്റെ നേതൃത്വത്തിൽ വിപുലമായ സ്വയം പ്രതിരോധ പരിശീലന പരിപാടിക്ക് തുടക്കമായി. വിദ്യാലയങ്ങളിലെ പെൺകുട്ടികളെ സ്വയം പ്രതിരോധ സേനയാക്കി മാറ്റുക എന്ന ലക്ഷ്യത്തോടെയാണ് ഈ പദ്ധതി വിഭാവനം ചെയ്തിരിക്കുന്നത്.

ഓരോ സ്കൂളിൽ നിന്നും തിരഞ്ഞെടുക്കപ്പെട്ട നാല് കുട്ടികളെ വീതം ജില്ലയിലെ മൂന്ന് കേന്ദ്രങ്ങളിൽ വെച്ച് വിദഗ്ധ പരിശീലനം നൽകി, അവരെ അതത് സ്കൂളുകളിലെ മറ്റ് കുട്ടികൾക്കുള്ള ട്രെയിനർമാരായി മാറ്റുകയാണ് ഈ പരിശീലനത്തിന്റെ പ്രധാന ലക്ഷ്യം.

മൂന്ന് കേന്ദ്രങ്ങളിലായി പരിശീലനം

പദ്ധതിയുടെ ആദ്യ ഘട്ടമെന്ന നിലയിൽ കാസറഗോഡ് സബ് ഡിവിഷനിൽപ്പെട്ട വിവിധ സ്കൂളുകളിൽ നിന്നായി തിരഞ്ഞെടുത്ത 200 വിദ്യാർത്ഥിനികൾക്ക് കാസർകോട് ഗവൺമെന്റ് കോളേജിൽ വെച്ച് പരിശീലനം നൽകി. വരും ദിവസങ്ങളിൽ ബേക്കൽ, കാഞ്ഞങ്ങാട് സബ് ഡിവിഷനുകൾ കേന്ദ്രീകരിച്ച് ശനി, ഞായർ ദിവസങ്ങളിലായി മറ്റ് വിദ്യാർത്ഥിനികൾക്കും സമാനമായ രീതിയിൽ സ്വയം പ്രതിരോധ പരിശീലനം നൽകുന്നതാണ്. ജില്ലയിൽ നിന്ന് പ്രത്യേക പരിശീലനം സിദ്ധിച്ച 14 പോലീസ് ഉദ്യോഗസ്ഥരാണ് കുട്ടികൾക്ക് ക്ലാസുകൾ നയിക്കുന്നത്.

ഔദ്യോഗിക ഉദ്ഘാടനം

കാസറഗോഡ് ഗവൺമെന്റ് കോളേജിൽ വെച്ച് നടന്ന ജില്ലാതല പരിശീലന പരിപാടി അഡീഷണൽ പോലീസ് സൂപ്രണ്ടും സോഷ്യൽ പോലീസിംഗ് ഡിവിഷൻ ജില്ലാ നോഡൽ ഓഫീസറുമായ സന്തോഷ് കുമാർ ഉദ്ഘാടനം ചെയ്തു. ദൈനംദിന ജീവിതത്തിലും വിവിധ സാഹചര്യങ്ങളിലും പെൺകുട്ടികൾ നേരിടേണ്ടി വന്നേക്കാവുന്ന അതിക്രമങ്ങളിൽ നിന്ന് സ്വയം രക്ഷ നേടാനും, പ്രതിസന്ധികളെ ധൈര്യപൂർവ്വം നേരിടാനും ഈ പരിശീലനം അവർക്ക് കരുത്താകുമെന്ന് അദ്ദേഹം അഭിപ്രായപ്പെട്ടു.

ചടങ്ങിൽ സോഷ്യൽ പോലീസിംഗ് ഡിവിഷൻ ജില്ലാ കോഡിനേറ്റർ രാമകൃഷ്ണൻ ചാലിങ്കൽ, ജനമൈത്രി പോലീസ് എ.ഡി.എൻ.ഒ ശശിധരൻ കെ., പരിശീലകരായ പ്രസീത, സൈദ എന്നിവർ പങ്കെടുത്തു.

 വാർത്തകൾക്കും പരസ്യം നല്കാനും വിളിക്കേണ്ട നമ്പർ: 8907020550 വായനക്കാർക്ക് സ്റ്റേറ്റ് എക്സ്പ്രസ്സ്‌ ന്യൂസ് വാട്സാപ്പ്  ഗ്രൂപ്പിൽ ചേരാൻ* താഴെ കാണുന്ന ലിങ്കിൽ ക്ലിക്ക് ചെയ്യുക👇👇👇

https://chat.whatsapp.com/Lb9KI8KEC4wDAtVU2XlcHC

https://chat.whatsapp.com/I5SOV9ZKNeQ1ivwyxEpjz4

https://chat.whatsapp.com/KVyB12YOI1n5zC18W9cZfa