*ഇന്ത്യൻ പാസ്‌പോർട്ട് ഉടമകൾക്ക് പുതിയ തിരിച്ചടി; വിസ നിയമം കടുപ്പിച്ച് ഇറാൻ ഉൾപ്പെടെ നാല് രാജ്യങ്ങൾ*

വിദേശയാത്രകൾ ആസൂത്രണം ചെയ്യുന്ന ഇന്ത്യൻ പാസ്‌പോർട്ട് ഉടമകൾക്ക് പ്രധാന മുന്നറിയിപ്പുമായി നാല് രാജ്യങ്ങൾ. 2026-ൽ ഇറാൻ, ബൊളീവിയ, കേപ് വെർഡെ, നിക്കരാഗ്വ എന്നീ രാജ്യങ്ങൾ ഇന്ത്യക്കാർക്കുള്ള പ്രവേശന ചട്ടങ്ങളിൽ മാറ്റം വരുത്തിയതോടെ, മുമ്പുണ്ടായിരുന്ന എളുപ്പത്തിലുള്ള യാത്രാ സൗകര്യങ്ങൾ ഇനി ലഭ്യമല്ല.

ഇറാനിൽ ഇനി വിസ രഹിത പ്രവേശനമില്ല

ഇന്ത്യൻ വിനോദസഞ്ചാരികൾക്ക് ഏറെ പ്രിയപ്പെട്ട രാജ്യങ്ങളിലൊന്നായ ഇറാൻ ഇന്ത്യക്കാർക്കുള്ള വിസ രഹിത പ്രവേശനം പിൻവലിച്ചു. പേർഷ്യൻ വാസ്‍തുവിദ്യയും സിൽക്ക് റൂട്ട് പൈതൃകവും കൊണ്ട് പ്രശസ്‍തമായ ഇറാനിലെ ടെഹ്റാൻ, ഇസ്‍ഫഹാൻ, ഷിറാസ്, യസ്‍ദ് തുടങ്ങിയ നഗരങ്ങളും പെർസെപൊളിസ്, നഖ്ഷെ ജഹാൻ സ്ക്വയർ തുടങ്ങിയ യുനെസ്‌കോ ലോക പൈതൃക കേന്ദ്രങ്ങളും ഇന്ത്യൻ സഞ്ചാരികളുടെ പ്രധാന ആകർഷണങ്ങളാണ്.

ബൊളീവിയയിലേക്ക് പോകാൻ മുൻകൂട്ടി വിസ വേണം

ബൊളീവിയയും യാത്രാ ചട്ടങ്ങൾ കർശനമാക്കിയിട്ടുണ്ട്. ഇനി ഇന്ത്യൻ പാസ്‌പോർട്ട് ഉടമകൾ യാത്രയ്ക്ക് മുമ്പ് വിസ നിർബന്ധമായും നേടണം. ലോകത്തിലെ ഏറ്റവും വലിയ ഉപ്പുപ്രദേശമായ സലാർ ഡി ഉയൂനി, ടിറ്റിക്കാക്ക തടാകം, ആൻഡീസ് പർവതനിരകൾ എന്നിവയാണ് ബൊളീവിയയുടെ പ്രധാന വിനോദസഞ്ചാര കേന്ദ്രങ്ങൾ.

കേപ് വെർഡെയിൽ വിസ ഓൺ അറൈവൽ നിർത്തലാക്കി

അറ്റ്ലാന്റിക് സമുദ്രത്തിലെ ദ്വീപ് രാഷ്ട്രമായ കേപ് വെർഡെ ഇന്ത്യ ഉൾപ്പെടെയുള്ള നിരവധി രാജ്യങ്ങളിലെ പൗരന്മാർക്കുള്ള വിസ ഓൺ അറൈവൽ സൗകര്യം അവസാനിപ്പിച്ചു. അതിനാൽ വിമാനത്താവളത്തിലെത്തി വിസ നേടാമെന്ന രീതിക്ക് പകരം യാത്രയ്ക്ക് മുമ്പ് ആവശ്യമായ അനുമതി ഉറപ്പാക്കണം.

നിക്കരാഗ്വയിലേക്കും മുൻകൂർ യാത്രാനുമതി

മധ്യ അമേരിക്കൻ രാജ്യമായ നിക്കരാഗ്വയും ഇന്ത്യക്കാർക്കുള്ള പ്രവേശന നടപടികൾ പുതുക്കിയിട്ടുണ്ട്. ഇനി യാത്രയ്ക്ക് മുമ്പ് ആവശ്യമായ യാത്രാനുമതി നേടിയിരിക്കണം. കോളനിവൽക്കരണ കാലഘട്ടത്തിലെ നഗരങ്ങൾ, അഗ്നിപർവതങ്ങൾ, പസഫിക് തീരങ്ങൾ എന്നിവയാണ് നിക്കരാഗ്വയുടെ പ്രധാന ആകർഷണങ്ങൾ.

ഇന്ത്യക്കാർ അറിയേണ്ടത്

ഏറ്റവും പുതിയ ഹെൻലി പാസ്‌പോർട്ട് സൂചിക പ്രകാരം ഇന്ത്യൻ പാസ്‌പോർട്ട് ഉടമകൾക്ക് ഇപ്പോഴും 55 രാജ്യങ്ങളിലേക്ക് വിസ രഹിതമായോ, വിസ ഓൺ അറൈവൽ വഴിയോ, ഇലക്ട്രോണിക് യാത്രാനുമതിയോടെയോ യാത്ര ചെയ്യാൻ സാധിക്കും. എന്നാൽ വിവിധ രാജ്യങ്ങളുടെ കുടിയേറ്റ നയങ്ങളിൽ ഇടയ്ക്കിടെ മാറ്റങ്ങൾ സംഭവിക്കുന്നതിനാൽ, യാത്ര ബുക്ക് ചെയ്യുന്നതിന് മുമ്പ് ഏറ്റവും പുതിയ വിസ നിബന്ധനകൾ പരിശോധിക്കുന്നത് അനിവാര്യമാണ്.

 വാർത്തകൾക്കും പരസ്യം നല്കാനും വിളിക്കേണ്ട നമ്പർ: 8907020550 വായനക്കാർക്ക് സ്റ്റേറ്റ് എക്സ്പ്രസ്സ്‌ ന്യൂസ് വാട്സാപ്പ്  ഗ്രൂപ്പിൽ ചേരാൻ* താഴെ കാണുന്ന ലിങ്കിൽ ക്ലിക്ക് ചെയ്യുക👇👇👇

https://chat.whatsapp.com/Lb9KI8KEC4wDAtVU2XlcHC

https://chat.whatsapp.com/I5SOV9ZKNeQ1ivwyxEpjz4

https://chat.whatsapp.com/KVyB12YOI1n5zC18W9cZfa