അസഭ്യം പറഞ്ഞാൽ കേസില്ലേ?”കാസർകോട്: കാസർകോട് ടൗൺ പോലീസ് അധികൃതർക്കെതിരെ ഗുരുതര ആരോപണം; ഡ്രൈവിംഗ് സ്കൂൾ ഉടമയെ സംരക്ഷിക്കുന്നതായും പരാതി.

കാസർകോട് : വിദ്യാനഗറിൽ പ്രവർത്തിക്കുന്ന ഒരു ഡ്രൈവിംഗ് സ്കൂൾ ഉടമക്കെതിരെ സ്ത്രീയെ പൊതുവേദിയിൽ വാക്കാൽ അധിക്ഷേപിച്ചെന്ന പരാതിയിൽ കേസ് എടുക്കാൻ പോലീസ് വിസമ്മതിച്ചതായി ആരോപണം. “സ്ത്രീയെ വാക്കാൽ അപമാനിച്ചതിന് കേസെടുക്കാൻ പ്രത്യേക വകുപ്പ് ഇല്ല” എന്ന നിലപാടാണ് കാസർകോട് ടൗൺ പോലീസ് ഉദ്യേഗസ്ഥർ സ്വീകരിച്ചതെന്ന് പരാതിക്കാരിയായ ഖദീജത്ത് സുഹൈബ ആരോപിച്ചു.

07-02-2026-ന് ഡ്രൈവിംഗ് ടെസ്റ്റിനുള്ള തീയതി ഓൺലൈനായി സ്വന്തമായി ബുക്ക് ചെയ്ത ശേഷം കൺസന്റ് ലെറ്റർ ലഭിക്കാൻ വിദ്യാനഗറിലെ ഡ്രൈവിംഗ് സ്കൂളിൽ എത്തിയപ്പോഴാണ് പ്രശ്നം ഉണ്ടായത്. 3000 രൂപ അധികമായി ആവശ്യപ്പെട്ടതിനെ ചോദ്യം ചെയ്തതോടെ, സ്കൂൾ പ്രൊപ്രൈറ്റർ പൊതുജനങ്ങളുടെ മുന്നിൽ വെച്ച് അപമാനകരമായി സംസാരിക്കുകയും സ്ഥാപനത്തിന്റെ കാർഡ് പിടിച്ചെടുത്തു കീറിക്കളയുകയും ചെയ്തതായി സുഹൈബ വ്യക്തമാക്കി.

“ഒരു സ്ത്രീ എന്ന നിലയിൽ ഞാൻ അനുഭവിച്ചത് ക്രൂരമായ മാനഹാനിയാണ്,” അവർ പറഞ്ഞു.

09-02-2026-ന് ഭർത്താവിനൊപ്പം പ്രശ്നം സമാധാനപരമായി പരിഹരിക്കാൻ വീണ്ടും സ്ഥാപനത്തിലെത്തിയപ്പോൾ വാക്കേറ്റം ഉണ്ടായി. തുടർന്ന് സ്കൂൾ ഉടമ ഭർത്താവിനെ ശാരീരികമായി മർദ്ദിച്ചതായും, കഴുത്തിലും ശരീരഭാഗങ്ങളിലും പരിക്കേറ്റതായും മെഡിക്കൽ പരിശോധനയിൽ സ്ഥിരീകരിച്ചതായും പരാതിക്കാരി വ്യക്തമാക്കി.

സംഭവത്തെ തുടർന്ന് മൂന്ന് തവണ സ്റ്റേഷനിൽ എത്തിയിട്ടും പരാതി സ്വീകരിക്കാൻ തയ്യാറായില്ലെന്നാണ് ആരോപണം. “സ്ത്രീയെ അധിക്ഷേപിച്ചതിന് പ്രത്യേക വകുപ്പ് ഇല്ല” എന്ന മറുപടിയാണ് പോലീസിൽ നിന്നുണ്ടായതെന്ന് സുഹൈബ പറയുന്നു. കൂടാതെ കേസ് മുന്നോട്ട് കൊണ്ടുപോയാൽ ഭർത്താവിനെ പ്രതിയാക്കുമെന്ന രീതിയിലുള്ള സമ്മർദ്ദവും ഉണ്ടായതായി അവർ ആരോപിച്ചു.

സ്ത്രീയെ പൊതുസ്ഥലത്ത് അപമാനിച്ച സംഭവത്തിൽ കേസ് എടുക്കാൻ മടിക്കുന്നത് പ്രതിയെ സംരക്ഷിക്കുന്ന നിലപാടാണെന്ന ആക്ഷേപം ശക്തമാകുന്നു. സ്ത്രീസുരക്ഷയെക്കുറിച്ച് ആവർത്തിച്ച് പ്രസ്താവനകൾ നടത്തുന്ന ആഭ്യന്തര വകുപ്പിന്റെ നിലപാടിനെ ഇത് ചോദ്യം ചെയ്യുന്നതായി സാമൂഹിക പ്രവർത്തകർ അഭിപ്രായപ്പെട്ടു.

നീതി തേടി ജില്ലാ പോലീസ് സൂപ്രണ്ടിനെ സമീപിച്ചതിനൊപ്പം മനുഷ്യാവകാശ പ്രവർത്തനങ്ങളിൽ സജീവമായ ജില്ലാ ജനകീയ നീതിവേദിയെയും പരാതിക്കാരി സമീപിച്ചു. സംഘടനയുടെ ജനറൽ സെക്രട്ടറി മുഖ്യമന്ത്രിക്ക് നിവേദനം നൽകിയതിനെ തുടർന്ന് മുഖ്യമന്ത്രിയുടെ ഓഫീസിൽ നിന്ന് കാസർകോട് അസിസ്റ്റന്റ് സൂപ്രണ്ടിന് അന്വേഷണം നടത്തി റിപ്പോർട്ട് സമർപ്പിക്കാൻ നിർദേശം നൽകിയതായി അറിയുന്നു.

മുഖ്യമന്ത്രിയുടെ ഓഫീസ് നിർദേശപ്രകാരം ഇരകളുടെ മൊഴി രേഖപ്പെടുത്തിയതൊഴിച്ചാൽ മറ്റ് കാര്യമായ നടപടികൾ ഉണ്ടായിട്ടില്ലെന്ന ആരോപണവും ഉയരുന്നു. കുറ്റക്കാരനെതിരെ നടപടി ഉണ്ടായില്ലെങ്കിൽ വീണ്ടും മുഖ്യമന്ത്രിയെ സമീപിക്കുമെന്നും ആവശ്യമായാൽ കോടതിയെ സമീപിക്കുമെന്നും സംഘടനാ നേതാക്കൾ അറിയിച്ചു.

ഇതിനുപുറമെ വിഷയത്തിൽ സംസ്ഥാന വനിതാ കമ്മീഷൻ, സംസ്ഥാന മനുഷ്യാവകാശ കമ്മീഷൻ, പോലീസ് കംപ്ലയന്റ് അതോറിറ്റി എന്നിവിടങ്ങളിലേക്കും പരാതി നൽകുമെന്ന് ജില്ലാ ജനകീയ നീതിവേദി ഭാരവാഹികൾ അറിയിച്ചു.

നിയമ വിദഗ്ധർ ചൂണ്ടിക്കാട്ടുന്നത്, ഇന്ത്യൻ ശിക്ഷാനിയമപ്രകാരം സ്ത്രീയെ വാക്കാൽ അപമാനിക്കൽ കുറ്റകരമായ പ്രവൃത്തിയാണെന്നും, ലഭിച്ച പരാതിയിൽ FIR രജിസ്റ്റർ ചെയ്യുന്നത് പോലീസിന്റെ നിയമബാധ്യതയാണെന്നും ആണ്.

“സ്ത്രീ സുരക്ഷ വെറും മുദ്രാവാക്യമാകരുത്. നീതി തേടി സ്റ്റേഷനിൽ കയറിയിറങ്ങേണ്ടി വന്നത് തന്നെ വേദനാജനകമാണ്,” എന്ന് സുഹൈബ പ്രതികരിച്ചു.

സംഭവത്തിൽ സമഗ്രവും നിഷ്പക്ഷവുമായ അന്വേഷണം നടത്തണമെന്നാവശ്യപ്പെട്ട് വിവിധ സാമൂഹിക സംഘടനകളും രംഗത്തെത്തിയിട്ടുണ്ട്. കാസർകോട്ടെ ഈ സംഭവം സ്ത്രീകളുടെ നിയമാവകാശങ്ങളും പോലീസിന്റെ ഉത്തരവാദിത്വവും സംബന്ധിച്ച് വിപുലമായ ചർച്ചയ്ക്ക് വഴിവെച്ചിരിക്കുകയാണ്.

 വാർത്തകൾക്കും പരസ്യം നല്കാനും വിളിക്കേണ്ട നമ്പർ: 8907020550 വായനക്കാർക്ക് സ്റ്റേറ്റ് എക്സ്പ്രസ്സ്‌ ന്യൂസ് വാട്സാപ്പ്  ഗ്രൂപ്പിൽ ചേരാൻ* താഴെ കാണുന്ന ലിങ്കിൽ ക്ലിക്ക് ചെയ്യുക👇👇👇

https://chat.whatsapp.com/Lb9KI8KEC4wDAtVU2XlcHC

https://chat.whatsapp.com/I5SOV9ZKNeQ1ivwyxEpjz4

https://chat.whatsapp.com/KVyB12YOI1n5zC18W9cZfa