*സംഭല് അക്രമം: മുല്ല അഫ്രോസിന്റെ കരുതല്തടവ് സുപ്രിം കോടതി റദ്ദാക്കി; യുപി സര്ക്കാരിന് 10 ലക്ഷം പിഴ*
ന്യൂഡല്ഹി: 2024-ലെ സംഭല് അക്രമവുമായി ബന്ധപ്പെട്ട് മുല്ല അഫ്രോസിനെതിരെയുള്ള 1980-ലെ ദേശീയ സുരക്ഷാ നിയമപ്രകാരമുള്ള (എന്.എസ്.എ.) കരുതല് തടവ് സുപ്രിംകോടതി റദ്ദാക്കി. അഫ്രോസിന്റെ കരുതല് തടവ് ശരിവച്ച അലാഹാബാദ് ഹൈക്കോടതി ഉത്തരവ് ജസ്റ്റിസ് ദിപാങ്കര് ദത്ത, ജസ്റ്റിസ് ശീല് നാഗു എന്നിവരടങ്ങിയ ബെഞ്ചാണ് റദ്ദാക്കിയത്. പോലിസ് കസ്റ്റഡിയിലിരിക്കെ പ്രതി നല്കിയതായി പറയപ്പെടുന്ന കുറ്റസമ്മത മൊഴിയെ കരുതല് തടവിനുള്ള അടിസ്ഥാനമായി സ്വീകരിക്കാന് ഉത്തര്പ്രദേശ് സര്ക്കാരിന് കഴിയില്ലെന്ന് കോടതി വ്യക്തമാക്കി. കുറ്റസമ്മത മൊഴി മാത്രം കരുതല്തടവിനുള്ള ഏക കാരണമായി കാണാന് കഴിയില്ലെന്നും കേസിന്റെ മറ്റ് സാഹചര്യങ്ങളും പരിശോധിക്കേണ്ടതുണ്ടെന്നും സുപ്രിംകോടതി നിരീക്ഷിച്ചു. കരുതല് തടവ് ഉത്തരവ് പുറപ്പെടുവിക്കുന്നതിന് മുമ്പ് ബന്ധപ്പെട്ട പ്രധാന തെളിവുകളും വിവരങ്ങളും പരിഗണിക്കുന്നതില് തടവ് ഉത്തരവിട്ട അധികാരി പരാജയപ്പെട്ടുവെന്ന് കോടതി കണ്ടെത്തി. തുടര്ന്ന് അഫ്രോസിന്റെ കരുതല് തടവ് ഉത്തരവും തടവ് ശരിവച്ച അലാഹാബാദ് ഹൈക്കോടതി വിധിയും സുപ്രിംകോടതി റദ്ദാക്കി. കൂടാതെ, ഉത്തര്പ്രദേശ് സര്ക്കാരിന് പത്ത് ലക്ഷം രൂപ പിഴ ചുമത്തുകയും ചെയ്തു. 2024 നവംബറില് ഷാഹി ജുമാ മസ്ജിദില് കോടതി ഉത്തരവുപ്രകാരം നടത്തിയ സര്വേയെത്തുടര്ന്ന് സംഭലിലുണ്ടായ അക്രമസംഭവങ്ങളില് നിന്നാണ് ഈ കേസിന്റെ തുടക്കം. സംഘര്ഷത്തില് നാല് പേര് കൊല്ലപ്പെട്ടിരുന്നു. അക്രമം നടന്ന് ഏകദേശം 54 ദിവസങ്ങള്ക്ക് ശേഷമാണ് അഫ്രോസിനെ പോലിസ് അറസ്റ്റ് ചെയ്തത്. പിന്നീട് അലാഹാബാദ് ഹൈക്കോടതി ഇയാള്ക്ക് ജാമ്യം അനുവദിച്ചിരുന്നു. എന്നാല്, 2025 ഒക്ടോബര് 13-ന് സംഭല് ജില്ലാ മജിസ്ട്രേറ്റ് എന്.എസ്.എ. സെക്ഷന് 3 പ്രകാരം അഫ്രോസിനെ കരുതല് തടവിലാക്കാന് ഉത്തരവിട്ടു. തുടര്ന്ന് അലാഹാബാദ് ഹൈക്കോടതി ഈ കരുതല് തടവ് ശരിവച്ചതോടെയാണ് അഫ്രോസ് സുപ്രിംകോടതിയെ സമീപിച്ചത്.
വാർത്തകൾക്കും പരസ്യം നല്കാനും വിളിക്കേണ്ട നമ്പർ: 8907020550 വായനക്കാർക്ക് സ്റ്റേറ്റ് എക്സ്പ്രസ്സ് ന്യൂസ് വാട്സാപ്പ് ഗ്രൂപ്പിൽ ചേരാൻ* താഴെ കാണുന്ന ലിങ്കിൽ ക്ലിക്ക് ചെയ്യുക👇👇👇
https://chat.whatsapp.com/Lb9KI8KEC4wDAtVU2XlcHC
https://chat.whatsapp.com/I5SOV9ZKNeQ1ivwyxEpjz4
https://chat.whatsapp.com/KVyB12YOI1n5zC18W9cZfa
No comments