*പോലീസ് നായ ഓടിക്കയറിയ പറമ്പിലെ താമസക്കാരൻ മരിച്ചനിലയിൽ; സംഭവം മോഷണക്കേസിൽ മൊഴിയെടുക്കാൻ വിളിപ്പിച്ചതിന് പിന്നാലെ*
കാസർകോട് : പെരിയാട്ടടുക്കത്ത് മോഷണം നടന്ന വീടിന് സമീപവാസിയായ 63-കാരനെ തൂങ്ങിമരിച്ച നിലയിൽ കണ്ടെത്തി. പനയാൽ മുതുവത്ത് തൊട്ടിയിൽ താമസിക്കുന്ന കെ.ആർ. ബാലകൃഷ്ണനാണ് വ്യാഴാഴ്ച ഉച്ചയ്ക്ക് രണ്ടരയോടെ മരിച്ചത്. മോഷണക്കേസുമായി ബന്ധപ്പെട്ട് മൊഴി നൽകാൻ പോലീസ് ആവശ്യപ്പെട്ടതിന് പിന്നാലെയാണ് സംഭവം. മരണത്തിന് മോഷണവുമായി ബന്ധമുണ്ടോയെന്ന കാര്യം പോലീസ് വിശദമായി പരിശോധിച്ചുവരികയാണ്.സംഭവങ്ങളുടെ തുടക്കം വ്യാഴാഴ്ച പുലർച്ചെപെരിയാട്ടുക്കം നീരാറ്റിലെ പി. ധന്യയുടെ വീട്ടിലെ കിടപ്പുമുറിയിൽ സൂക്ഷിച്ച അഞ്ചുപവൻ ആഭരണങ്ങളും 3000 രൂപയും മോഷണം പോയിരുന്നു. വ്യാഴാഴ്ച പുലർച്ചെ 5.15-ന് വീട് പൂട്ടി താക്കോൽ മീറ്റർ ബോക്സിനുള്ളിൽ വെച്ചശേഷം ധന്യ പ്രഭാതനടത്തത്തിന് പോയിരുന്നു. 6.05-ന് തിരികെവരുകയും ചെയ്തു. ഇതിനുള്ളിൽ താക്കോലെടുത്ത് കതക് തുറന്ന് അകത്ത് കയറിയയാൾ രണ്ടുപവന്റെ വള, മൂന്നുപവന്റെ കൈച്ചെയിൻ, 3000 രൂപ എന്നിവ മോഷ്ടിച്ചു.ധന്യയുടെ പരാതിയിൽ ബേക്കൽ പോലീസ്, വിരലടയാളവിദഗ്ധർ, ഫൊറൻസിക് വിഭാഗം തുടങ്ങിയവർ സ്ഥലത്തെത്തി. അതിനിടെ പോലീസ് നായ മണംപിടിച്ച് ചുറ്റുവട്ടത്തെ പറമ്പുകളിലൂടെ ഓടിയിരുന്നു. കെ.ആർ. ബാലകൃഷ്ണന്റെ വളപ്പിലും പോലീസ് നായ കയറിയെന്ന് നാട്ടുകാർ പറഞ്ഞു. പോലീസ് ഇദ്ദേഹത്തിൽനിന്ന് മൊഴിയെടുത്തിരുന്നു. പരാതിക്കാരി സംശയം പറഞ്ഞവരുടെ കൂട്ടത്തിൽ ബാലകൃഷ്ണന്റെ പേരുമുണ്ടായിരുന്നുവെന്നും പോലീസ് പറഞ്ഞു. ഉച്ചയോടെ പോലീസ് സംഘം വീണ്ടും പരാതിക്കാരിയുടെ വീട്ടിലെത്തി. ബാലകൃഷ്ണന്റെ മകനോട് വിശദമായ മൊഴിനൽകാൻ അച്ഛനോട് സ്റ്റേഷനിൽ വരണമെന്നും പറഞ്ഞേൽപ്പിച്ചിരുന്നു. ഇതിന് പിന്നലെ ബാലകൃഷ്ണനെ വീടിനടുത്തുള്ള മരത്തിൽ തൂങ്ങിയനിലയിൽ കണ്ടതായി സ്ഥലത്തുണ്ടായിരുന്ന അന്വേഷണസംഘത്തിന് വിവരം ലഭിച്ചു. ഇവർതന്നെയാണ് കെട്ട് അറുത്ത് താഴെയിറക്കി പോലീസ് വാഹനത്തിൽ ഉദുമയിലെ സ്വകാര്യ ആസ്പത്രിയിലെത്തിച്ചത്. നില ഗുരുതരമായതിനാൽ കാസർകോട്ടേക്ക് കൊണ്ടുപോയെങ്കിലും രക്ഷിക്കാൻ കഴിഞ്ഞില്ല. വീരാജ്പേട്ടയിലെ രാമൻ നായരുടെയും കല്യാണിയുടെയും മകനാണ് മരിച്ച ബാലകൃഷ്ണൻ. ഭാര്യ: എ. രാധ. മകൻ: അൻഷിത്.വിശദമായി അന്വേഷണം നടക്കുകയാണെന്ന് ബേക്കൽ ഇൻസ്പെക്ടർ പി. അജിത്ത് കുമാർ പറഞ്ഞു. പരാതിക്കാരി സംശയം പറഞ്ഞവരെയെല്ലാം വിശദമായ മൊഴി രേഖപ്പെടുത്താൻ വിളിപ്പിച്ചിട്ടുണ്ട്. അക്കൂട്ടത്തിലാണ് ബാലകൃഷ്ണനോടും മൊഴി ആവശ്യപ്പെട്ടിരുന്നതെന്നും ഇൻസ്പെക്ടർ പറഞ്ഞു.

വാർത്തകൾക്കും പരസ്യം നല്കാനും വിളിക്കേണ്ട നമ്പർ: 8907020550 വായനക്കാർക്ക് സ്റ്റേറ്റ് എക്സ്പ്രസ്സ് ന്യൂസ് വാട്സാപ്പ് ഗ്രൂപ്പിൽ ചേരാൻ* താഴെ കാണുന്ന ലിങ്കിൽ ക്ലിക്ക് ചെയ്യുക👇👇👇
https://chat.whatsapp.com/Lb9KI8KEC4wDAtVU2XlcHC
https://chat.whatsapp.com/I5SOV9ZKNeQ1ivwyxEpjz4
https://chat.whatsapp.com/KVyB12YOI1n5zC18W9cZfa
No comments