*കുളിക്കുന്നതിനിടെ വാട്ടർ ടാങ്ക് ദേഹത്തേക്ക് മറിഞ്ഞു വീണു; യുവാവിന് ദാരുണാന്ത്യം*

കൊണ്ടോട്ടിയിൽ വാട്ടർ ടാങ്ക് സ്റ്റാൻഡ് തകർന്ന് ദേഹത്തേക്ക് മറിഞ്ഞ് യുവാവ് മരിച്ചു. കൊണ്ടോട്ടി കരുവാങ്കല്ല് വട്ടപറമ്പ് സ്വദേശി ചോനാരി മുഹമ്മദ് ഫൈസൽ (38) ആണ് അന്തരിച്ചത്.

ഇന്ന് വൈകുന്നേരം ആണ് അപകടം നടന്നത്. ​ഇരുമ്പ് കമ്പിയുടെ സ്റ്റാൻഡിൽ ഉയർത്തി വെച്ചിരുന്ന വാട്ടർ ടാങ്കിനടിയിൽ ഇരുന്നു കുളിക്കുകയായിരുന്നു ഫൈസൽ. ഈ സമയം സ്റ്റാൻഡിന്റെ കമ്പി പെട്ടെന്ന് തകരുകയും ടാങ്ക് ഫൈസലിന്റെ ദേഹത്തേക്ക് മറിയുകയുമായിരുന്നു.

ടാങ്കിന്റെ ഭാരവും ആഘാതവും കാരണം ഗുരുതരമായി പരിക്കേറ്റ ഫൈസലിനെ ഉടൻ തന്നെ നാട്ടുകാർ ചേർന്ന് തിരൂരങ്ങാടി ഗവൺമെന്റ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

​

മൃതദേഹം ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. പോസ്റ്റ്‌മോർട്ടം നടപടികൾക്ക് ശേഷം ബന്ധുക്കൾക്ക് വിട്ടുനൽകും. ഖബറടക്കം നാളെ പുളിയംപറമ്പ് ജുമാ മസ്‌ജിദിൽ നടക്കും.

പരേതനായ ചോനാരി അബൂബക്കറാണ് പിതാവ്. മാതാവ്, നഫീസ. ഭാര്യ, നാസില ഫാത്തിമ. മക്കൾ: മുഹമ്മദ് ഹാറൂൺ, ഖാജാ മുഹമ്മദ്, ഫിൽദ ഫാത്തിമ. സഹോദരന്മാർ : ശിഹാബ്, സൈഫുദ്ദീൻ.